Morgunblaðið | 23.9.2016 | 11:01

Rifust í Legolandi

Sjónarvottar segja að hjónin hafi verið alvörugefin á svipinn. Ljósmynd / skjáskot Daily Mail

Það hefur líkast til ekki farið fram hjá mörgum að leikarahjónin Angelina Jolie og Brad Pitt eru að skilja, en leikkonan sótti um skilnað frá eiginmanni sínum fyrr í vikunni.

Tíðindin komu mörgum í opna skjöldu, en Jolie sagðist hafa tekið ákvörðunina með hag fjölskyldunnar að leiðarljósi. Þá hefur hún einnig farið fram á forræði yfir börnum þeirra sex.

Fregnir herma að leikarinn sæti rannsókn alríkislögreglunnar í Bandaríkjunum (FBI), en hann er sakaður um að hafa veist að syni þeirra, Maddox, í síðustu viku. Þá hefur því einnig verið haldið fram að þetta sé ástæða skilnaðarins.

Í október í fyrra náðust myndir af hjónunum þar sem þau voru í fríi með börnum sínum í Legolandi í Windsor, en svo virðist vera sem þau hafi átt í talsverðum erjum.

„Ég heyrði ekki hvað þau voru að segja, og vissi ekki að þau voru að rífast. Það var ekki fyrr en við kíktum á myndirnar sem við sáum að þau höfðu verið í miðju rifrildi. Við sáum þau síðan aftur, en þau voru nokkuð alvarleg á svipinn þar sem þau gengu um garðinn,“ er haft eftir ljósmyndaranum.

Frétt Daily Mail