Morgunblaðið | 2.10.2016 | 13:06

Kutbettin Gülen handtekinn í Tyrklandi

AFP

Tyrkneska lögreglan handtók bróður Fethullah Gülen í dag en Fethullah Gülen er sakaður um að bera ábyrgð á valdaránstilrauninni í júlí. Fethullah Gülen, klerkur, dvelur í sjálfskipaðri útlegð í Bandaríkjunum.

Kutbettin Gülen var handtekinn eftir að lögreglu barst ábending um hvar hann væri að finna. Var hann á heimili ættingja í Gaziemir-sýslu í Izmir-héraði. Hann er fyrstur af Gülen-systkinunum sem er handtekinn í tengslum við valdaránstilraunina sem fór út um þúfur.

Hann er sakaður um aðild að vopnuðum vígasamtökum, segir í frétt ríkisfréttastofunnar. Kutbettin Gülen er í yfirheyrslum hjá hryðjuverkadeild lögreglunnar og hald var lagt á bækur sem hann hafði undir höndum.

Tyrknesk yfirvöld hafa gefið út handtökuskipun á hendur Gülen og krafið bandarísk yfirvöld um að framselja hann til Tyrklands. Hann neitar því hins vegar að tengjast valdaráninu á nokkurn hátt en hann hefur verið í útlegð frá árinu 1999.