Morgunblaðið | 4.10.2016 | 10:00

Brad Pitt algerlega niðurbrotinn

Leikarinn er sagður leita sér stuðnings hjá foreldrum sínum. Ljósmynd / skjáskot Daily Mail

Tvær vikur eru liðnar síðan leikkonan Angelina Jolie sótti um skilnað frá leikaranum Brad Pitt. Tíðindin komu í kjölfar atviks í einkaþotu þeirra hjóna, þar sem leikarinn er sagður hafa veist að 15 ára syni þeirra.

Leikarinn er sagður algerlega niðurbrotinn og illa á sig kominn í kjölfar ákvörðunar Jolie.

„Hann er í slæmu ásigkomulagi og trúir varla að svona sé fyrir honum komið, en börnin eru það eina sem hann heldur í,“ sagði ónefndur heimildamaður tímaritsins Us Weekly.

„Hann hefur reitt sig á fjölskyldu sína og er í stöðugu sambandi við foreldra sína, nána vini og umboðsmann sinn. Mamma hans er í stöðugu sambandi við hann.“

Áður hefur verið greint frá því að Jolie hafi fengið forræði yfir börnunum til bráðabirgða. Pitt fær þó að heimsækja þau, í fyrstu undir eftirliti sérfræðings sem síðan mun ákvarða um framhaldið.

Því hefur einnig verið haldið fram að leikaranum verði gert að fara í áfengis- og fíkniefnapróf, en hann hefur þegar gengist sjálfviljugur undir eitt slíkt sem reyndist neikvætt.