Morgunblaðið | 17.10.2016 | 17:29

SFS harma niðurstöðu verkfallskosninga

Heiðrún Lind Marteinsdóttir er framkvæmdastjóri Samtaka fyrirtækja í sjávarútvegi. mbl.is/Ófeigur Lýðsson

Svohljóðandi fréttatilkynning barst 200 mílum frá Samtökum fyrirtækja í sjávarútvegi:

Fyrir liggur niðurstaða kosninga aðildarfélaga Sjómannasambands Íslands, Verkalýðsfélags Vestfjarða, VM Félags vélstjóra og málmtæknimanna og Sjómannafélags Íslands um verkfallsboðun hinn 10. nóvember næstkomandi. Samkvæmt henni hafa sjómenn samþykkt að fara í verkfall.

Samtök fyrirtækja í sjávarútvegi (SFS) telja niðurstöðuna vonbrigði. Það er á sameiginlegri ábyrgð allra aðila að reyna til þrautar að koma í veg fyrir að starfsemi stöðvist um lengri eða skemmri tíma vegna verkfallsaðgerða. SFS bindur vonir við að aðilar leggi allt kapp á að ná saman um samning áður en verkfall hefst.

Samninganefndir náðu saman um samninga í sumar, en þeir voru síðar felldir í atkvæðagreiðslu sjómanna. Nú vekur jafnframt athygli að nokkur fjöldi sjómanna kýs að taka ekki þátt í atkvæðagreiðslu um verkfallsboðun.

Með hliðsjón af þessu er sérstaklega brýnt að aðilar setjist enn á ný niður og reyni að ná samkomulagi um kjaramál. Verkfall er neyðarúrræði og komi til þess mun það valda samningsaðilum og samfélaginu öllu tjóni.