Morgunblaðið | 10.11.2016 | 19:27 | Uppfært 20:02

„Höfum náð ágætis árangri“

Guðmundur Ragnarsson (til vinstri) á leið til fundar í dag ásamt Jens Garðari Helgasyni, formanni Samtaka fyrirtækja í sjávarútvegi. mbl.is/Golli

„Við erum búnir að tala saman síðan hálftvö í dag og það hefur ýmislegt náðst að hreinsa út. Við höfum náð ágætis árangri í viðræðunum,“ segir Guðmundur Ragnarsson, formaður VM.

Samningaviðræður í kjaradeilu sjómanna hafa staðið yfir í allan dag hjá ríkissáttasemjara.

Guðmundur segir að enn séu atriði óleyst sem menn sitja yfir og reyna að ráða fram úr. „Við höldum áfram að kasta þessu á milli okkar fram á kvöld. Það er ótímabært að leggja mat á það hvort þetta endar í verkfalli eða ekki. Þetta getur farið í báðar áttir.“

Verkfall sjómanna hefst klukkan 23 í kvöld ef ekki tekst að semja fyrir þann tíma.

Frétt mbl.is: Slitnaði upp úr sáttafundi í gær

Frá upphafi fundarins hjá ríkissáttasemjara í dag. mbl.is/Golli

Mikil ábyrgð að fara í verkfall

Aðspurður vill Guðmundur ekki meina að líkurnar á verkfalli hafi aukist.

„Það er oft þannig að þegar tíminn nálgast fara menn kannski að tala öðruvísi saman og tala meira í lausnum. Báðir aðilar gera sér grein fyrir því að það er mikil ábyrgð að fara í verkfall og stundum þarf þessa pressu til að menn klári hluti sem eru kannski búnir að vera mjög flóknir í marga mánuði," segir hann.