Franskir repúblikanar velja frambjóðanda
Setja bókamerki
Útlit er fyrir að mjótt verði á mununum á milli þriggja frambjóðenda í forvali franska miðhægri Repúblikanaflokksins. Atkvæðagreiðsla í fyrri umferð forvalsins hófst í dag en Nicolas Sarkozy, fyrrverandi forseti, er einn þremenninganna sem keppast um útnefningu flokksins.
Nýjustu skoðanakannanir benda til þess að Francois Fillon, sem var forsætisráðherra í forsetatíð Sarkozy, eigi möguleika á að komast áfram í seinni umferð forvalsins þar sem kosið verður á milli efstu tveggja frambjóðendanna eftir fyrri umferðina. Alain Juppe, fyrrverandi forsætisráðherra, var fyrir fram talinn líklegastur til að hljóta útnefninguna.
Auk þremenninganna eru fjórir aðrir í framboði.
Búist er við því að sá sem sigrar í forvalinu muni etja kappi við öfgaþjóðernissinnann Marine Le Pen í forsetakosningunum á næsta ári.
Sarkozy hefur unnið á að undanförnu en hann er sagður hafa höfðað til popúlískra hvata stuðningsmanna Repúblikanaflokksins.
Alls voru 2,5 milljónir kjósenda á kjörskrá í forvalinu. Ekki er búist við fyrstu tölum fyrr en kl. 21:30. Seinni umferð forvalsins fer fram eftir viku.
/frimg/9/59/959341.jpg)
