Morgunblaðið | 6.12.2016 | 9:24

Hafa komist að samkomulagi

Angelina Jolie og Brad Pitt hafa komist að tímabundnu samkomulagi hvað varðar forræði yfir börnum þeirra. AFP

Angelina Jolie og Brad Pitt hafa komist að tímabundnu samkomulagi hvað varðar forræði yfir börnum þeirra sex.

Greint hefur verið frá því að börnin verði áfram í forsjá Jolie, en Pitt muni fá að hitta þau undir eftirliti sérfræðinga. E! News greindi frá þessu, og vitnar í dómsskjöl.

Ennfremur er greint frá því að leikarinn þurfi vikulega að hitta sálfræðing. Þá mun hann einnig þurfa að fara í áfengis- og fíkniefnapróf reglulega. Börnin eru einnig sögð munu þurfa að sækja sálfræðimeðferð.

Jolie sótti um skilnað frá Pitt í september, en í kjölfarið hófst rannsókn á Pitt sem sakaður var um að hafa veist að syni sínum um borð í einkaþotu þeirra hjóna. Rannsókn málsins er lokið og var Pitt hreinsaður af öllum grun.

Frétt mbl.is: Brad Pitt hreinsaður af öllum grun