Morgunblaðið | 9.12.2016 | 14:56

Þungt áfall í öryggismálum sjómanna

Öryggi sjómanna verður að vera tryggt, enda íslensk veður válynd og starfsumhverfi stéttarinnar stórhættulegt. mbl.is/Þröstur Njálsson

Landssamband smábátaeigenda lýsir yfir miklum áhyggjum vegna þeirrar fyrirætlunar að skerða fjárframlög til Landhelgisgæslunnar. Gangi hún eftir mun öryggi sjómanna verða fyrir þungu áfalli.

Ekki lengur hægt að stóla á þyrlu né varðskip þegar alvarleg slys eða veikindi verða, að því er fram kemur í áskorun félagsins til Alþingis.

LS skorar á alþingismenn að tryggja nauðsynlegan rekstur Landhelgisgæslunnar þannig að trygg verði sú þjónusta sem henni er lögskipað að sinna.

Þyrluþjónusta er öryggisþáttur sem ávallt verður að vera vel sinnt og ekki má undir neinum kringumstæðum skerða.

Landssamband smábátaeigenda lýsir yfir þungum áhyggjum af öryggi sjómanna og skorar á alþingismenn að bregðast við. mbl.is/Árni Sæberg

Landssamband smábátaeigenda ítrekar fyrri samþykktir sínar á nauðsyn þess að ræða við nágrannaþjóðir okkar um hvort hugsanlegt væri að einhver þeirra eða allar gætu ásamt Íslendingum komið að rekstri þyrlna við Norður-Atlantshaf.

Ljóst sé að nokkrar þjóðir hefðu þar beina hagsmuni, eins og Færeyingar, Norðmenn, Danir og Grænlendingar.

Í framtíðinni gæti þetta samstarf, ef af yrði, jafnvel leitt af sér stofnun sameiginlegrar björgunarmiðstöðvar við N-Atlantshaf með aðsetur hér á landi, að því er fram kemur í áskoruninni sem birt er á vefsvæði Landssambandsins.