Morgunblaðið | 14.12.2016 | 13:31 | Uppfært 16:32

Ótímabundið verkfall sjómanna staðreynd

Sjómenn hefja ótímabundið verkfall sitt í kvöld kl. 20. mbl.is/Hlynur Ágústsson

Samtök fyrirtækja í sjávarútvegi segja niðurstöðu atkvæðagreiðslu sjómanna mikil vonbrigði fyrir alla hlutaðeigandi.

Heiðrún Lind Marteinsdóttir, framkvæmdastjóri SFS, segir í fréttatilkynningu um málið erfitt að henda reiður á það hvað hafi orðið til þess að sjómenn felldu samningana. Mikið hafi verið komið til móts við kröfur þeirra og mikil vinna lögð í samningana.

Fréttatilkynning SFS hljóðar svo:

„Kjarasamningar, sem undirritaðir voru í nóvember, á milli Samtaka fyrirtækja í sjávarútvegi (SFS) og Sjómannasambands Íslands (SSÍ), Verkalýðsfélags Vestfjarða (VV), Sjómannafélags Íslands (SÍ) og Sjómanna- og vélstjórafélags Grindavíkur (SVG) voru í dag felldir í atkvæðagreiðslu.

Niðurstaða atkvæðagreiðslu vegna kjarasamninga á milli SFS og Félags vélstjóra og málmtæknimanna (VM) mun liggja fyrir næstkomandi föstudag, hinn 16. desember.

Kjarasamningar SFS við stéttarfélögin voru undirritaðir hver um sig dagana 11. til 15. nóvember sl. og verkfalli stéttarfélaga sjómanna var frestað í kjölfarið. Rafrænni atkvæðagreiðsla um þessa kjarasamninga lauk kl. 12:00 í dag, hinn 14. desember. Niðurstaða atkvæðagreiðslunnar er sú sem áður er greint frá. Sökum þessa hefst ótímabundið verkfall stéttarfélaganna á ný í kvöld kl. 20:00.

Heiðrún Lind Marteinsdóttir segir ósætti sem ekki sé hönd á festandi illlæknanlegt og harmar niðurstöðu kosningarinnar. mbl.is/Árni Sæberg

Samkvæmt Heiðrúnu Lind Marteinsdóttur, framkvæmdastjóra SFS veldur niðurstaðan vonbrigðum: „Mikil vinna var lögð í samningana og miðað við gerðar kröfur sjómanna telur SFS að komið hafi verið verulega til móts við þær. Er því óljóst á hvaða forsendum sjómenn kjósa að fella gerða samninga. Ósætti, sem ekki er hönd á festandi, er erfitt að lækna. Við tekur hins vegar ótímabundið verkfall, með ófyrirséðu fjárhagslegu tjóni fyrir útgerðir, sjómenn og samfélagið allt. Það hljóta að vera vonbrigði fyrir alla hlutaðeigandi.““