Morgunblaðið | 4.1.2017 | 11:07

Þarf að hugsa út fyrir boxið

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, á leið til fundar fyrir áramót. mbl.is/Golli

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, segir að vinna hafi farið fram undanfarna daga með aðildarfélögunum við að finna mögulegar leiðir til lausnar á sjómannadeilunni.

„Mín tilfinning er að við þurfum að hugsa út fyrir boxið því það verður ekki alltaf byggt ofan á eldri samning. Við erum í rauninni að byrja á upphafsreit,“ segir Heiðrún Lind um deiluna.

Á morgun mun SFS funda með sjómannaforystunni eftir jólafrí en síðasti fundur var haldinn 20. desember.

Frétt mbl.is: Næsti fundur eftir áramót

Verkfall sjómanna hefur staðið yfir síðan 14. desember. mbl.is/Sigurður Bogi Sævarsson

Spurð hvort SFS hafi rætt við sjómenn síðustu daga segir hún sambandið alltaf vera í góðum samskiptum við sjómenn. „Ég held að það sé góður vilji til að reyna að finna lausn á málinu,“ segir hún.

„Ég hugsa að línur muni að einhverju leyti skýrast á morgun og að menn nái saman um einhvers konar viðræðuáætlun.“