Morgunblaðið | 4.1.2017 | 18:25 | Uppfært 19:05

Yfir 1.000 umsóknir vegna verkfalls

Næsti fundur í sjómannadeilunni verður á morgun. mbl.is/Hlynur Ágústsson

Borist hafa í kringum 1.100 umsóknir um atvinnuleysisbætur til Vinnumálastofnunar vegna sjómannaverkfallsins.

Um 900 umsóknir eru þegar komnar inn í kerfi stofnunarinnar en þar fyrir utan eru um 200 til 250 á leiðinni þangað inn.

Umsóknirnar sem tengdust vinnslustöðvun í fiskvinnslu voru 832 talsins 29. desember.

Frétt mbl.is: 832 umsóknir um atvinnuleysistryggingar

Fiskvinnsla hjá HB Granda. mbl.is/Ernir Eyjólfsson

Betri tölur í lok vikunnar

Að sögn Unnar Sverrisdóttur, aðstoðarforstjóra Vinnumálastofnunar, hefur umsóknunum fjölgað jafnt og þétt með hverjum deginum sem hefur liðið síðan verkfallið hófst 14. desember síðastliðinn.

Hún sér ekki merki um annað en að þær muni halda áfram að berast. „Svo er allur gangur á því hvaða bótarétt fólk á. Það þarf að meta það einstaklingsbundið,“ segir Unnur.

Hún býst við því að í lok vikunnar verði komnar betri tölur um hversu margir úr fiskvinnslunni hafa sótt um bætur frá áramótum.