Morgunblaðið | 20.1.2017 | 17:05

Verkbann SFS á vélstjóra hefst í kvöld

Guðmundur Ragnarsson formaður VM segir aðgerðir SFS ósangjarnar og hvetur félagsmenn til að sýna hörku og samstöðu gegn þeim. Mynd úr safni.

Samtök fyrirtækja í sjávarútvegi (SFS) hefur hafnað beiðni VM um frestun á verkbanni, sem samtökin boðuðu á vélstjóra á fiskiskipum. Verkbannið mun því hefjast kl. 22:00 í kvöld.

VM, félag vélstjóra og málmtæknimanna, hvetur vélstjóra innan félagsins, til að mæta þessari aðgerð af fullri hörku. Þá hvetur Guðmundar Ragnarsson, formaður VM, félagsmenn til að neita því að sótt verði um undanþágu á verkbanninu fyrir þá.

„Félagið getur þá stutt þá félagsmenn í að neita að vinna í verkbanninu og komið í veg fyrir þvinganir af hálfu fyrirtækjanna á vélstjóra. Við hljótum að ganga út frá því að fyrirtæki innan SFS ætli að vera sjálfum sér samkvæm og framfylgja verkbanninu,“ segir Guðmundar Ragnarsson formaður félagsins.