Morgunblaðið | 24.1.2017 | 14:24

Ábyrgðin hjá báðum aðilum

Guðmundur Ragnarsson, formaður VM. mbl.is/Eggert Jóhannesson

Staðan í kjaraviðræðum sjómanna og vélstjóra við Samtök fyrirtækja í sjávarútvegi er mjög alvarleg eftir að upp úr viðræðunum slitnaði. Þetta kemur fram í fréttatilkynningu frá samninganefnd VM - Félags vélstjóra og málmtæknimanna. Þar segir ennfremur að fullyrðing SFS um að VM og félög sjómanna hafi slitið viðræðunum sé röng.

Samninganefnd VM líti svo á að á fundinum hjá ríkissáttasemjara hafi niðurstaðan orðið sú að ekki væri flötur á áframhaldandi viðræðum. Því hafi fundi fundi slitið. Ábyrgðin á því liggi hjá báðum aðilum. Ýmislegt hafi náðst fram í samningaferlinu af kröfum VM. Full ástæða sé til þess að halda því til haga. Hins vegar sé undirliggjandi mikil óánægja meðal vélstjóra á fiskiskipum sem orðið hafi til þess að kjarasamningurinn sem gerður hafi verið var felldur. Ástæða þess sé að stórum hluta á ábyrgð útgerðanna.

„Það er verkefni samninganefndar VM að leita allra leiða til að koma á kjarasamningi við SFS og undan þeirri ábyrgð verður ekki vikist. Þrátt fyrir þann tíma sem er liðinn, frá því að verkfallið hófst og marga fundi, hefur samninganefnd VM ekki fengið sjálfstæðan fund með SFS um sérkröfur VM. Vilji samninganefndarinnar er að fá áframhaldandi viðræður um sérkröfur vélstjóra á fiskiskipum. Hafni SFS því er augljóst hver samningaviljinn er af þeirra hálfu.“