Morgunblaðið | 16.2.2017 | 13:17

Frestun verkfalls kemur ekki til greina

Hólmgeir Jónsson (t.h.), framkvæmdastjóri Sjómannasambands Íslands, ásamt Valmundi Valmundssyni, formanni félagsins.

Hólmgeir Jónsson, framkvæmdastjóri Sjómannasambands Íslands, segir að ekki komi til greina að fresta sjómannaverkfallinu á meðan greiningarvinna fer fram um fjárhagslegar afleiðingar þess ef gengið yrði að kröfum sjómanna um skattaafslátt af fæðisgjaldi.

Í tillögu sjávarútvegs- og landbúnaðarráðherra kemur fram að greiningunni verði lokið í síðasta lagi í lok apríl.

Frétt af mbl.is

Í síðasta lagi tilbúnar í lok apríl

„Við gerum það ekki. Við þurfum að fá lausn í þetta núna,“ segir Hólmgeir, spurður út í mögulega frestun verkfallsins.

Ekki mun takast að veiða þann loðnukvóta sem veittur hefur verið, ef verkfall sjómanna heldur áfram á meðan á greiningunni stendur. Hólmgeir segist ekki finna fyrir þrýstingi vegna þess. „Ég finn það ekkert hjá okkur.“

Spurður hvort það sér réttlætanlegt að ríkið grípi inn í vegna fæðisgjaldsins og geti þannig sett fordæmi fyrir kjaraviðræður annarra stétta, svarar Hólmgeir: „Okkur finnst það réttlæti að sjómenn fái dagpeninga. Það eru peningar sem fara allir í fæðiskostnað. Þeir borga fæðið sitt sjálfir og ef ríkið er búið að hirða af þessu skatt áður þá dugir það ekki fyrir fæðiskostnaði.“