Morgunblaðið | 17.2.2017 | 22:51

Lagði fram málamiðlunartillögu

Þorgerður Katrín Gunnarsdóttir, sjávarútvegsráðherra. mbl.is/Eggert

Þorgerður Katrín Gunnarsdóttir, sjávarútvegs- og landbúnaðarráðherra, lagði fram málamiðlunartillögu á fundum sínum með deiluaðilum í kjaraviðræðum sjómanna fyrr í kvöld. Þetta herma heimildir mbl.is, en tillögunni mun ætlað að koma til móts við aðila deilunnar.

Talið er því líklegt að samninganefndir beggja aðila fundi nú um þessa tillögu í húsakynnum ríkissáttasemjara, en fundur þar hófst laust upp úr klukkan tíu í kvöld, að loknum fundum þeirra í sitt hvoru lagi með ráðherra í sjávarútvegsráðuneytinu.

Á miðvikudag greindi mbl.is frá því að ráðherrann hefði lagt fram tillögu um að skoða fæðis- og dagpeninga á almennum vinnumarkaði. Ekki er ljóst hvort tillagan, sem hún lagði fram í kvöld, er sama efnis. Þó hefur verið samið um öll mál í kjaradeilu sjómanna og útgerðarinnar nema um eitt atriði, er varðar mögulegan skattaafslátt af fæðispeningum sjómanna.