Morgunblaðið | 19.2.2017 | 21:04 | Uppfært 20.2.2017 5:21

Halda úr höfn í kvöld

Drangavík VE-80 frá Vestmannaeyjum er meðal skipa Vinnslustöðvarinnar. mbl.is/Ómar

Þau skip sem verða tilbúin til að halda á veiðar hjá Vinnslustöðinni í Vestmannaeyjum munu halda úr höfn í kvöld. Þetta segir Sigurgeir Brynjar Kristgeirsson, framkvæmdastjóri Vinnslustöðvarinnar, í samtali við mbl.is eftir að ljóst varð að sjómenn hefðu samþykkt nýjan kjarasamning.

Frétt af mbl.is

„Afskaplega feginn“

Frétt af mbl.is

Samþykktu samninginn naumlega

Hann segir að í dag hafi verið sprettur við bryggjurnar og menn hafi verið áhugasamir að komast á sjó. Þó beri niðurstaðan með sér að stór hluti hafi verið á móti samningnum, en 52,4% samþykktu samninginn og 46,9% greiddu atkvæði gegn honum. „Það er greinileg óánægja og það þarf að skoða betur,“ segir Sigurgeir og bendir á að í samningnum sé ákvæði um að fara í heildarskoðun á skiptaálaginu og það þurfi að hefja þá vinnu strax.

Núna skiptir mestu að koma uppsjávarskipunum á loðnuveiðar að sögn Sigurgeirs, en aðeins 3-4 vikur eru eftir af loðnutímabilinu og var kvótinn hækkaður upp í 186 þúsund tonn í síðustu viku. Mestan hluta þess kvóta á enn eftir að veiða og því gríðarlega miklir fjármunir í húfi sem hefur sett svip sinn á verkfallið.

Sigurgeir Brynjar Kristgeirsson, framkvæmdastjóri Vinnslustöðvarinnar. Þorvaldur Örn Kristmundsson

Fjölmargir skipverjar eru að sögn Sigurgeirs tilbúnir til að fara á sjó og komu jafnvel til Vestmannaeyja úr landi áður en niðurstaðan lá ljós fyrir. „Það vissu allir að það gat brugðið til beggja vona,“ segir Sigurgeir.

„Þetta var voðalega tæpt, en gott að það sé kominn samningur,“ segir hann og bætir við að að öðrum kosti hefðu væntanlega verið sett lög á verkfallið þó að hann gæti ekkert fullyrt um það.