Morgunblaðið | 19.2.2017 | 21:16 | Uppfært 20.2.2017 5:18

„Mikill léttir“

Heiðrún Lind Marteinsdóttir, framkvæmdastjóri SFS, tekur í hönd eins nefndarmanns í samninganefnd sjómanna. mbl.is/Eggert

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, segir þau mjög ánægð með að sjómenn hafi samþykkt nýjan kjarasamning.

„Þetta er mikill léttir. Ég held að það sé stór kostur að sjómenn hafi samþykkt samninginn, svo að þetta er samningur sem báðir aðilar hafa fallist á og við getum þá átt gott samstarf til næstu ára,“ segir Heiðrún í samtali við mbl.is.

Hvað tekur núna við?

„Það er að koma skipunum á sjó og ná þessari loðnu, það er brýnasta verkefnið að svo stöddu. Svo auðvitað taka við önnur mál sem hafa því miður setið á hakanum á meðan verkfallið hefur staðið yfir.“