Morgunblaðið | 20.2.2017 | 13:22 | Uppfært 14:00

Mikill léttir fyrir Grimsby

Martyn Boyers er vel kunnugur Íslandi og íslenskum fiski. Ljósmynd/Grimsby fish market

„Nú þegar verkfallið er búið fáum við vonandi meira af fiski. Þetta er mikill léttir en það kom á óvart hversu lengi við þurftum að bíða. Ég veit að þetta hefur haft meiri áhrif á sjávarútvegsfyrirtæki á Íslandi en þetta hefur verið einstaklega óheppilegt fyrir Grimsby,“ segir Martyn Boyers, forstjóri Grimsby fish market.

Frétt af mbl.is

Norðmenn vilja ólmir fylla í skarðið

Frétt af mbl.is

BBC fjallar um sjómannaverkfallið

Grimsby fish market sér um uppboð á ferskum fiski og í gegnum tíðina hefur mikill meirihluti, um 75%, verið veiddur af íslenskum sjómönnum og segir Martyn að Grimsby, stundum nefndur Grímsbær, sé stærsti viðtakandi íslensks sjávarfangs.

„Gámurinn fer frá Reykjavík á fimmtudegi þannig að við fáum fyrsta farminn í næstu viku. Það verða þorskur, ýsa og rauðspretta. Það er mikil spurn eftir rauðsprettu á þessum árstíma því hún er í mun betra ástandi á íslensku miðunum en í Norðursjó.“

Erfitt að endurnýja markaðsleiðir

Greint var frá því að Martyn hefði þurft að segja upp fimmtungi starfsmanna sinna í febrúar vegna verkfallsins. Hann segir að erfitt gæti reynst að endurheimta sum viðskiptasambönd í fljótu bragði.

„Ég held að fyrirtæki sem kaupa yfirleitt fisk frá Íslandi hafi leitað annarra leiða. Þegar þú finnur nýjan seljanda og viðskiptasambandið gengur vel þá ferðu ekki endilega aftur í sama horf. Það gæti því tekið smá tíma fyrir íslenska sjávarútveginn að endurnýja markaðsleiðirnar en ég held að það verði komið í eðlilegt horf til lengri tíma litið,“ segir Martyn. Hann bætir við að óánægja sjómanna með samninginn sé áhyggjuefni fyrir erlenda kaupendur.

„Þetta hefur áhrif á viðhorf til framboðs á íslenskum fiski og síðan skilst mér að samningurinn hafi verið naumlega samþykktur þannig að margir sjómenn eru greinilega óánægðir. Það er áhyggjuefni og dregur úr stöðugleika íslenska sjávarútvegarins.“