Morgunblaðið | 28.2.2017 | 13:01 | Uppfært 14:00

Ákærður fyrir ítrekuð brot gegn stjúpdætrum

Málið er rekið fyrir Héraðsdómi Reykjavíkur. mbl.is

Karlmaður hefur verið ákærður af embætti héraðssaksóknara fyrir ítrekuð kynferðisbrot gegn tveimur stjúpdætrum sínum þegar þær voru 15 ára. Í ákæru málsins segir að maðurinn hafi í að minnsta kosti fimm skipti áreitt aðra stúlkuna kynferðislega með því að káfa, bæði innan og utan klæða, á maga og rassi stúlkunnar og utanklæða á brjóstum hennar. Þá kyssti hann háls hennar og setti tær hennar í munn sér.

Er hann ákærður fyrir að hafa áreitt hina stúlkuna kynferðislega með að hafa farið með hendi inn fyrir bol stúlkunnar og strokið yfir brjóst hennar utan á brjóstahaldara. Þá er hann einnig ákærður fyrir að hafa káfað á brjóstum hennar innanklæða í rúmi sem hann og móðir stúlknanna gistu í.

Er ákært á grundvelli 2. málsgreinar laga númer 201 í almennum hegningarlögum. Þar er kveðið á um refsingu vegna kynferðislegrar áreitni við börn á aldrinum 15-17 ára sem tengjast viðkomandi fjölskylduböndum eða verið trúað fyrir kennslu og uppeldi barnsins. Getur hún varðað fangelsi allt að 4 árum.

Málið var þingfest í héraðsdómi í dag.