Morgunblaðið | 28.3.2017 | 18:00 | Uppfært 29.3.2017 13:18

Fáir valkostir eftir áratugastörf

„Kannski að maður setjist á skólabekk eða kannski ég verði heimavinnandi amma,“ segir Skúlína Hlíf Guðmundsdóttir, starfsmaður HB Granda á Akranesi, vegna stöðunnar sem komin er upp þar. „Vonandi get ég fengið einhverja vinnu,“ segir Jóhann Þór Sigurðsson en þau hafa unnið í 22 og 39 ár í fiskvinnslunni.

Þau Skúlína og Jóhann eru trúnaðarmenn starfsmanna hjá fyrirtækinu og voru nýkomin af fundi með Sævari Frey Þráinssyni bæjarstjóra og Ólafi Adolfssyni formanni bæjarstjórnar þegar blaðamaður ræddi við þau í dag. Á fundinum kom fram að bæjaryfirvöld myndu reyna sitt ýtrasta til að halda starfsemi fyrirtækisins í bæjarfélaginu.

HB Grandi tilkynnti í gær að fyrirtækið hyggist loka botnfiskvinnslu sinni á Akranesi en þau segja að ákvörðunin hafi komið þeim algerlega í opna skjöldu og hafi verið þvert á það sem gefið hafi verið upp í kjölfar þess að verkfalli sjómanna lauk fyrr á árinu.