Morgunblaðið | 28.3.2017 | 14:44

Uppsagnir ekki í farvatninu í Eyjum

Sterkt gengi krónu er sagt koma illa við reksturinn. mbl.is/Árni Sæberg

Engar hópuppsagnir eru í farvatninu hjá Vinnslustöðinni í Vestmannaeyjum. Þetta segir Sigurgeir Brynjar Kristgeirsson, framkvæmdastjóri Vinnslustöðvarinnar, í samtali við mbl.is í kjölfar frétta af mögulegri lokun botnfiskvinnslu HB Granda á Akranesi.

„Fyrir það fyrsta höfum við ekki tekið þessa ákvörðun. En ástæðan fyrir því að við höfum uppi þessi áform eru fyrirsjáanlegir rekstrarerfiðleikar í landvinnslu,“ sagði Vilhjálmur Vilhjálmsson, forstjóri HB Granda, í samtali við mbl.is í gær. Helstu ástæðu erfiðleikanna sagði hann felast í gengi krónunnar.

Sigurgeir Brynjar tekur undir það að sterkt gengi krónu komi illa við reksturinn.

„En við erum bara að vinna úr því. Auðvitað erum við sífellt að skoða hvar er hægt að gera betur, en það eru engar stórar uppsagnir eða stórkostlegar breytingar í farvatninu.“

Misstu hillupláss og verðið féll

Spurður að hvaða leyti rekstrarumhverfið hafi breyst segir Sigurgeir Brynjar:

„Verðið hefur lækkað mjög mikið, sérstaklega á ferskum afurðum, meira heldur en gert hefur. Það er einfaldlega vegna þess að við sveltum markaðina í tvo og hálfan mánuð, misstum hillupláss og verðið féll um leið.“

Mat hans er því að gengi krónunnar og langt verkfall sjómanna eigi hvort tveggja sök að máli.

„Þetta kemur tvennt saman. Ef veitingastaður var með íslenskan þorsk á matseðlinum og fær hann svo ekki í tvo og hálfan mánuð, þá fer hann ekki umhugsunarlaust strax aftur á seðilinn.“