Morgunblaðið | 9.4.2017 | 19:55

Morð á gyðingum ekki Frakklandi að kenna

Le Pen segist vilja að frönsk börn verði aftur stolt af heimalandinu sínu. AFP

Marine Le Pen, forsetaframbjóðandi og leiðtogi Þjóðfylkingarinnar í Frakklandi, neitaði því í dag að franska ríkið bæri ábyrgð á samansöfnun gyðinga í París í seinni heimsstyrjöldinni og flutningi þeirra í útrýmingarbúðir nasista.

Jacques Chirac, fyrrverandi forseti, og Francois Holland, núverandi forseti, hafa báðir beðist afsökunar á aðkomu franskra lögregluyfirvalda í samansöfnun 13.000 gyðinga við Vel d'Hiv-hjólreiðabrautina sem var fyrirskipuð af nasistum árið 1942.

Le Pen sagði hins vegar í samtali við sjónvarpsstöðina LCI í dag að hún teldi Frakkland ekki bera ábyrgð á viðburðinum, sem hefur verið kenndur við hjólreiðabrautina.

„Ég held að almennt séð, ef einhver er ábyrgur, þá eru það þeir sem voru við völd á þessum tíma. Ekki Frakkland,“ sagði hún.

Le Pen sagði að frönskum börnum hefði verið sagt að þau hefðu fulla ástæðu til að gagnrýna landið sitt og einblína á myrkustu tímabil sögu þess.

„Ég vil að þau fyllist aftur stolti af Frakklandi,“ sagði hún.

Keppinautur Le Pen í forsetakapphlaupinu, Emmanuel Macron, sagði ummæli hennar „alvarleg mistök“.

„Sumir hafa gleymt að Marine Le Pen er dóttir Jean-Marie Le Pen,“ sagði hann í samtali við BFMTV en Le Pen eldri, stofnandi Þjóðfylkingarinnar, hefur ítrekað verið sakfelldur fyrir ummæli sín um gyðinga og helförina, sem hann sagði eitt sinn „smáatriði í sögunni“.