Le Pen sökuð um ritstuld
Setja bókamerki
Marine Le Pen, frambjóðandi frönsku Þjóðfylkingarinnar, er sökuð um ritstuld í ræðu sem hún hélt í gær 1. maí. Hún er sögð hafa stolið stórum hluta úr ræðu frambjóðandans Francois Fillon sem hann hélt 15. apríl, en Fillon komst ekki í seinni umferð forsetakosninganna. BBC greinir frá.
Stór hluti ræðunnar sem hún hélt er sagður tekinn nánast orðréttur upp úr ræðu sem Fillon hélt 15. apríl. Le Pen hélt ræðu sína í Villepinte í norðurhluta Parísar í gær 1. maí.
Fulltrúar frönsku Þjóðfylkingarinnar sögðu að hún væri að kinka kolli til Fillon, sem sýndi að hún væri „ekki heilög“.
Seinni umferð frönsku forsetakosninganna er á sunnudaginn, en þá mætast Le Pen og Emmanuel Macron.
Sjónvarpsrásin Ridicule TV á YouTube benti á ritstuldinn. Stuðningsmenn François Fillon komu stöðinni á laggirnar til að koma höggi á keppinaut hans, Macron, fyrir fyrri umferð forsetakosninganna. Það gekk ekki sem skyldi því Fillon féll úr leik í fyrri umferðinni.
/frimg/9/59/959341.jpg)
