„Kannanir staðist glettilega vel“
Setja bókamerki
„Stóru óvissuþættirnir eru kjörsókn og hversu margir skila auðu,“ segir Kristján Andri Stefánsson, sendiherra Íslands í Frakklandi, um forsetakosningarnar sem fara fram í dag. Valið stendur á milli þeirra Emmanuel Macron og Marine Le Pen.
Frétt mbl.is: Kosið í Frakklandi
Kristján segir að rólegt sé yfir París. Helgin er löng vegna frídags á morgun og margir héldu út úr borginni. Þá banna frönsk lög banna hvers konar kosningaáróður og kosningafundi af hálfu frambjóðenda degi fyrir kosningar.
Kosningaþátttaka í frönsku forsetakosningunum mældist 28,23% klukkan 12 að frönskum tíma (klukkan 10 að íslenskum). „Þetta er aðeins lélegra en á sama tíma í síðustu kosningum þegar hlutfallið var yfir 30%.“
Strax eftir fyrri umferðina bentu kannanir til þess að Macron myndi sigra með 60% atkvæða og hann hefur þokast upp eftir kappræðurnar á miðvikudaginn þar sem hann þótti koma betur úr þeim en mótframbjóðandinn Le Pen. Kristján segir að aðstæður í kosningunum séu öðruvísi en í Bretlandi og Bandaríkjunum þar sem kjör Trumps og Brexit fóru þvert á skoðanakannanir.
„Það var þannig í fyrri umferðinni að kannanir stóðust glettilega vel. Úrslitin fóru nálægt því sem kannanir sýndu.“
Frétt mbl.is: Tölvupóstum Macrons lekið á netið
Fyrir tveimur dögum var miklu magni tölvupósta sem fullyrt var að kæmu frá kosningaskrifstofu Emmanuel Macrons lekið á netið. Starfsmenn kosningabaráttu Emmanuel Macron sögðu að í lekanum hefði verið sambland af stolnum tölvupóstum forsetaframbjóðandans og fölsuðum skjölum til að rugla fólk í ríminu.
„Þetta er einkennilegur lokahnykkur á óvenjulegri kosningabaráttu. Þetta gerist rétt áður en kosningabaráttunni formlega lýkur og við tekur tíminn þar sem frambjóðendur mega ekki hafa sig í frammi,“ segir Kristján. „Umfjöllun hefur verið í algjöru lágmarki og franska kosningaeftirlitið gaf út tilmæli um að fjölmiðlar fjölluðu ekki um þetta.“
/frimg/9/59/959341.jpg)
