Morgunblaðið | 13.7.2017 | 18:35 | Uppfært 19:33

Rekstrarskilyrði í sjávarútvegi versnað

Rekstrarskilyrði í sjávarútvegi hafa versnað, segja SFS. mbl.is/Eggert

Samtök fyrirtækja í sjávarútvegi (SFS) segja að rekstrarskilyrði í sjávarútvegi hafi versnað og ekki er útilokað að álagning veiðigjalds fyrir næsta fiskveiðiár muni reynast einhverjum smærri og meðalstórum útgerðum ofviða. Slíkt gæti aukið samþjöppun í sjávarútvegi. Tilefnið er að sjávarútvegs- og landbúnaðarráðherra birti í dag reglugerð um veiðigjald fyrir komandi fiskveiðiár. Þetta kemur fram í tilkynningu.

Í reglugerð ráðuneytisins um veiðigjald er miðað við áætlað aflamark verði gjaldið um það bil 10,5 til 11,0 milljarðar króna, sem væri hækkun um 6 milljarða frá yfirstandandi fiskveiðiári, eða ríflega tvöföldun. Hækkun veiðigjalds vegna þorsks nemur 107%, ýsu 127% og makríls 18%.

„Rekstrarskilyrði í sjávarútvegi hafa versnað og ekki er útilokað að álagning veiðigjalds fyrir næsta fiskveiðiár muni reynast einhverjum smærri og meðalstórum útgerðum ofviða. Slíkt gæti aukið samþjöppun í sjávarútvegi.“ Þetta kemur jafnframt fram í tilkynningu.

„Þetta er mikil hækkun sem mun koma hart niður á fjölmörgum útgerðum og þær eru misjafnlega í stakk búnar til að standa undir gjaldinu. Hjá sumum útgerðum getur hækkunin verið allt að fjórföld. Álagningin byggist á gömlum afkomutölum, eins og undanfarin ár, en aðstæður hafa breyst mjög til hins verra á liðnum misserum; gengi krónunnar hefur styrkst og tekjur gjaldeyrisskapandi fyrirtækja dregist verulega saman. Á sama tíma hefur kostnaður í íslenskum krónum, eins og vegna aðfanga og launa, hækkað mikið.“ Þetta er haft eftir Heiðrúnu Lind Marteinsdóttur, framkvæmdastjóra SFS, í tilkynningu.