„Þjóðhátíðarlogn“ hjá Vinnslustöðinni

Makrílvinnslan hófst fyrir um hálfum mánuði hjá Vinnslustöðinni í Vestmannaeyjum og segir í frétt á vef VSV að nú séu breyttir tímar með nýjum framleiðslutækjum. Á fyrstu vikunum er ný flokkunarstöð keyrð upp“og ný pökkunarlína sömuleiðis í nýju vinnslu- og frystihúsi.

Sindri Viðarsson, sviðsstjóri hjá Vinnslustöðinni, segir að það muni mikið um nýjungarnar. „Það er skilvirkur og góður gangur í framleiðslunni. Meiri afköst og betri vara. Makríllinn sjálfur er góður en  gangurinn í veiðunum er skrykkjóttur á köflum. Það hefur komið fyrir að vaktir hjá okkur hafa dottið út vegna hráefnisskorts,“ segir Sindri.

Frétt af mbl.is

Miklar fjárfestingar hjá Vinnslustöðinni

Hann segir makrílinn hafa veiðst við Snæfellsjökul og jafnvel enn norðar. „Hingað til höfum við yfirleitt veitt við Eyjar fyrir þjóðhátíð en makríllinn hefur svo verið genginn vestar að þjóðhátíðarstoppi loknu. Svona gengur þetta hins vegar fyrir sig í ár.“

Binni í Vinnslustöðinni hljóp að sjálfsögðu til þess að ná plássi undir hvíta tjaldið eins og aðrir Eyjamenn í gær. mbl.is/Óskar P. Friðriksson

Á vef Vinnslustöðvarinnar segir að dottið sé á „þjóðhátíðarlogn“ í flota og landvinnslu VSV. Síðasti vinnudagur var í gær og sá næstu að líkindum ekki fyrr en á fimmtudag í næstu viku.

Frétt af mbl.is

Börðust um bestu stæðin

„Menn hlupu nánast frá færiböndunum upp í Herjólfsdal í gær til að ná í stæði fyrir þjóðhátíðartjöldin sín. Svo byrjaði djammið og við gerum ráð fyrir að það fari vika í hátíðarhöldin og að jafna sig í framhaldinu,“ segir sviðsstjórinn sem að sjálfsögðu hljóp sjálfur líka og gómaði lóð í Herjólfsdal fyrir sig og sína í kapphlaupi í dalnum.