Dreifist á önnur skip útgerðarinnar
Setja bókamerki
Kvóti Þerneyjar RE-1, sem HB Grandi hefur selt til Suður-Afríku eins og 200 mílur greindu frá í gær, mun dreifast á önnur skip útgerðarinnar. Þetta segir Vilhjálmur Vilhjálmsson, forstjóri HB Granda, í samtali við mbl.is.
„Það á eftir að koma í ljós hvernig það gengur en alla vega ætlum við að leggja upp með að það takist. Við erum þá með sex togara í rekstri og við reiknum með að þeir nái þessu,“ segir Vilhjálmur.
Um mitt ár 2019 er von á nýjum togara sem er nú í smíðum í spænsku skipasmíðastöðinni Astilleros Armon Gijon, en hann verður rúmlega 81 metra langur og 17 metra breiður. Stefnt er að því að hann verði þá einn stærsti og fullkomnasti flakafrystitogarinn sem gerður verður út við norðanvert Atlantshaf.
Ekkert hæft í orðrómum
Í kjölfar umfjöllunar um sölu Þerneyjar í gær hefur gengið sá orðrómur á netinu, að HB Grandi hafi boðið áhöfn skipsins að flytja til Suður-Afríku og halda þar áfram að starfa á skipinu, á lægri launum. Til að mynda er það fullyrt á vefnum skinna.is, en þar fæst ekki séð á hverra vegum vefurinn er.
Vilhjálmur þvertekur fyrir þetta og furðar sig á þessum staðhæfingum.
„Nei, ég kannast ekki við þetta. Það var einn sem spurði [á fundi með áhöfninni í gær] og ég held ég hafi svarað því til, að ég vissi ekki til að það stæði til boða. Enda efast ég um að það yrði eitthvað spennandi fyrir þá,“ segir Vilhjálmur. „Þetta er eitthvað sem er algjörlega úr lausu lofti gripið, að því er ég best veit.“
Þá hefur því einnig verið fleygt fram að félagið sem kaupir skipið, Sea Harvest Corporation Ltd., sé einhvers konar skuggafélag í eigu HB Granda.
„Nei, við höfum ekkert með það að gera. Þú getur kíkt á heimasíðuna hjá þeim og séð hvað þeir eru að gera. Þetta er bara öflugt fyrirtæki og stöndugt, eftir því sem ég best veit. Ég hef svo sem ekkert kíkt á efnahagsreikninginn hjá þeim.“
/frimg/1/48/37/1483749.jpg)
/frimg/1/17/97/1179742.jpg)
/frimg/1/31/19/1311968.jpg)
/frimg/1/29/88/1298860.jpg)
/frimg/1/22/33/1223326.jpg)
/frimg/1/28/3/1280300.jpg)
/frimg/1/27/87/1278789.jpg)
