Morgunblaðið | 5.10.2017 | 12:57 | Uppfært 15:07

„Stórbætir aðbúnað áhafnar um borð“

Engey, nýr togari HB Granda. mbl.is/Árni Sæberg

„Endurnýjun flotans er mjög mikilvæg fyrir félagið, það mun draga úr viðhaldskostnaði og auka gæði afla, stórbætir aðbúnað áhafnar um borð og vinnsluaðstöðu þeirra.“ Þetta kom fram í erindi Vilhjálms Vilhjálmssonar, forstjóra HB Granda, sem hann hélt á heimsþinginu um málefni sjávarfangs í Hörpu í september.

Fjallað er stuttlega um erindið á vef HB Granda en þar er haft eftir Vilhjálmi að nýr togari útgerðarinnar, Engey RE, sé án efa eitt tæknivæddasta skip landsins.

Í erindi sínu talaði Vilhjálmur um fjárfestingar í veiði og vinnslu og sýndi meðal annars brot úr heimildarmyndinni um Ásbjörn sem gerð var fyrr á árinu, ásamt nýju myndbandi sem tekið var um borð í Engey í þriðju veiðiferð skipsins í byrjun september.

Segir svo á vef HB Granda:

„Í þessum tveimur myndböndum sést vel hvernig tæknivæðing auðveldar vinnu um borð, minnkar álag á áhöfnina og dregur úr slysahættu. Aðbúnaðurinn um borð í Engey, með sjálfvirku lestarkerfi og SUB-CHILLING™ kerfi frá Skaganum 3X er allur miklu betri en í gamla Ásbirni.“

Sjá myndskeið