Morgunblaðið | 20.10.2017 | 15:33

Íhuga sölu á fiski beint á erlenda markaði

Örn Pálsson, framkvæmdastjóri landssambandsins. mbl.is/Eggert

Aðalfundur Landssambands smábátaeigenda hófst í gær með ræðum Axels Helgasonar, formanns LS, Arnar Pálssonar framkvæmdastjóra og Þorgerðar Katrínar Gunnarsdóttur sjávarútvegsráðherra. Síðan tóku við almenn fundarstörf, en þinginu lýkur í dag.

Fram kom á fundinum að heildaraflaverðmæti smábáta fiskveiðiárið 2016/2017 varð 18 milljarðar og minnkaði um fimm milljarða á milli ára eða um rúman fimmtung.

Örn Pálsson gerði lágt fiskverð síðasta árs meðal annars að umræðuefni og sagði að ýmsar skýringar hefðu verið gefnar á því, t.d. að vinnslan hefði tekið meira til sín vegna launahækkana sem orðið hefðu hjá fiskvinnslufólki.

„Grundfirðingar brugðust við hinu lága verði og ákváðu að selja á fiskmarkaði í Bretlandi. Tilraunin gekk vel. LS íhugar nú hvort rétt sé að undirbúa sölu beint á erlenda markaði af bátum félagsmanna,“ sagði Örn.

Fjallað er um aðalfundinn í Morgunblaðinu í dag.