Morgunblaðið | 6.11.2017 | 7:57 | Uppfært 14:01

Opnað fyrir dragnótaveiði inn í botn á Skagafirði

Skagfirskir trillukarlar eru óhressir en hér eru eyfirskir starfsbræður þeir komnir að landi með afla. mbl.is/Þorgeir Baldursson

Trillukarlar og smábátaeigendur í Skagafirði upplifa nú það sem þeir óttuðust, en vonuðu þó að ekki gerðist, að felld yrði úr gildi friðun í innanverðum firðinum fyrir dragnótaveiði.

Um árabil hefur innri hluti fjarðarins verið friðaður með línu sem dregin var frá Ásnefi vestan fjarðar að Þórðarhöfða austanmegin og hefur ríkt ágæt sátt um þetta fyrirkomulag að sögn þeirra sem rætt hefur verið við. Vegna þessa hefur Drangey – Smábátafélag Skagafjarðar sent starfandi sjávarútvegsráðherra bréf þar sem skorað er á ráðherrann að ákvörðun ráðuneytisins verði tafarlaust dregin til baka.

„Drangey – Smábátafélag Skagafjarðar mótmælir harðlega vinnubrögðum sjávarútvegsráðherra að afnema friðun á innanverðum Skagafirði fyrir dragnótaveiðum. Auk þess telur Drangey ákvörðunina vera andstæða öllum reglum sem gilda um störf ráðherra í starfsstjórn,“ segir í bréfinu.