Morgunblaðið | 7.12.2017 | 17:15

Þriðja og síðasta systirin lögð af stað

Systurskipin Engey RE og Akurey AK í höfn. Þriðja systirin er nú á leið til landsins. Ljósmynd/Kristján Maack

Viðey RE, nýr ísfisktogari HB Granda, er nú lögð af stað til Íslands frá skipasmíðastöðinni Celiktrans við Istanbúl. Hér má sjá staðsetningu hennar á gagnvirku korti.

Búast má við að Viðey fari til Akraness þar sem Skaginn 3X hefur samið við HB Granda um að setja upp nýjan vinnslu- og lestarbúnað í togaranum. Togarinn er sá þriðji og síðasti í röð skipa sem útgerðin fær frá tyrknesku skipasmíðastöðinni, en þegar hafa Engey RE og Akurey AK komið til landsins á árinu.

Vænta má skipsins þegar nær dregur jólum en heimsiglingin mun að líkindum taka um tvær vikur.

Frétt af mbl.is

Semja um búnað fyrir 1,2 milljarða

Viðey RE við bryggju í Tyrklandi. Ljósmynd/HB Grandi

Ekki takmark í sjálfu sér

Aukin hagkvæmni og fækkun kolefnisspora hafa verið leiðarstef við hönnun nýrra fiskiskipa, en Viðey verður enn eitt skipið sem kemur til landsins í þessari bylgju endurnýjunar.

Margvíslegar breytingar hafa orðið á hönnun fiskiskipa á síðustu árum og græn skref verið stigin, en fyrir almenning vekur stefni nýju togaranna trúlega mesta athygli og eflaust myndu einhverjir segja að skipin væru ekkert sérstakt augnayndi.

Alfreð Tulinius, skipatæknifræðingur hjá Nautic sem annaðist hönnun nýju skipanna þriggja fyrir HB Granda, sagðist fyrr á árinu í sjálfu sér geta tekið undir það, enda sé slíkt ekki takmark í sjálfu sér.