Netaveiðar við Ísland gætu lagst af

Netaveiðar við strendur landsins munu alfarið leggjast af, ef fram heldur sem horfir og stjórnvöld ákveða að uppfylla kröfur Bandaríkjanna hvað varðar meðafla sjávarspendýra. Þetta segir Axel Helgason, formaður Landssambands smábátaeigenda.

Áður hefur verið greint frá nýju ákvæði vestanhafs, í lög­um um vernd­un sjáv­ar­spen­dýra, sem valdið hefur mik­illi óvissu hjá fiskút­flytj­end­um hér á Íslandi og í Evr­ópu.

„Það eru all­ir eitt spurn­ing­ar­merki,“ sagði Bryn­hild­ur Bene­dikts­dótt­ir, sér­fræðing­ur at­vinnu­vega- og ný­sköp­un­ar­ráðuneyt­is­ins á sviði auðlinda­nýt­ing­ar, í samtali við 200 mílur fyrr í vikunni.

Frétt af mbl.is

Óvissa vegna nýrra takmarkana

Fiskurinn greiddur úr netinu. Óvissa ríkir víða vegna nýja ákvæðisins. mbl.is/Alfons Finnsson

„Mikil vonbrigði fyrir okkur“

Axel segir að LS hafi lagt áherslu á að sameinast öðrum löndum á Norðurlöndunum í að mótmæla þessum nýju takmörkunum.

„Og ráðuneytið tók vel í það, og tók undir að það væri sennilega eina vopnið sem við hefðum, ef allir sameinuðust um að hunsa þetta. En síðan þá virðist sá póll hafa verið tekinn að vinna ekki á móti þessu heldur með þeim [Bandaríkjamönnum],“ segir Axel.

„Það eru mikil vonbrigði fyrir okkur, því það er algjörlega ljóst að ef þessu verður framfylgt eins og þetta lítur út núna, þá hætta allar netaveiðar. Það verður engin leið að uppfylla þessi ákvæði um meðafla eins og þau eru nú í lögunum.“