Morgunblaðið | 8.12.2017 | 12:43

Vísa áhyggjum Loðnuvinnslunnar á bug

Fiskeldi Austfjarða bregst við yfirlýsingu Loðnuvinnslunnar. mbl.is/Helgi Bjarnason

Sjókvíaeldi í Fáskrúðsfirði mun ekki hafa neikvæð áhrif á gæði þess sjávar sem Loðnuvinnslan hf. mun nota. Þetta er álit vísindamanna í umhverfismálum hjá rannsóknar- og ráðgjafarstofunni Rorum.

Í tilkynningu sem borist hefur frá Fiskeldi Austfjarða kemur fram að í kjölfar yfirlýsingar Loðnuvinnslunnar á þriðjudag, þar sem lýst var áhyggjum af áhrifum lífrænna efna frá fiskeldi í firðinum á sjótöku útgerðarinnar til vinnslu, hafi eldisfyrirtækið ákveðið að óska eftir fræðilegu áliti sjálfstæðra vísindamanna.

Frétt af mbl.is

Loðnuvinnslan mótmælir áformum um fiskeldi

Styrkur næringarefna er sagður eðlilegur í kílómetra fjarlægð. mbl.is/Helgi Bjarnason

Úrgangurinn falli á botninn

Í áliti stofunnar segir að miskilnings virðist gæta um áhrifasvæði sjókvíaeldis og áhrif þess á fjarðarumverfi.

Fjölmargar kannanir hafi verið gerðar í gegnum tíðina, sem gefi afar skýra mynd af því hvernig ástand sjókvíaeldi skapar í fjörðum og hvaða áhrif eldið hefur á vistkerfi fjarða og tærleika vatns.

„Úrgangurinn fellur að mestu á botninn innan við 50 metra frá kvíunum og eyðist þar á hvíldartíma þegar eldistöku lýkur. Í stuttu máli sagt þá eru allar kannanir samhljóma og niðurstaðan er að lítilla áhrifa gætir í meira en 100 m fjarlægð frá kvíastæði og alls engra áhrifa gætir þegar komið er í 350 m fjarlægð,“ segir í álitinu.

Loðnuvinnslan hefur mótmælt áformum um fiskeldi í Fáskrúðsfirði. mbl.is/Helgi Bjarnason

Útilokað að Loðnuvinnslan finni breytingu

Greint er frá því að virt rannsóknarstofnun í Noregi, IRIS, hafi nýlega lokið við mjög ýtarlega og nákvæma rannsókn á þessum þáttum í Berufirði, í samstarfi við Fiskeldi Austfjarða og Rorum.

Niðurstöður þeirrar rannsóknar, og annarrar til viðbótar, séu algjörlega ótvíræðar. Vatnsinntak Loðnuvinnslunnar sé 6,7 kílómetrum frá næstu kvíum í straumstefnu, „þannig að algerlega útilokað er að þeir muni nokkurn tímann finna neina breytingu á sínum vatnsgæðum vegna sjókvíaeldis í firðinum.“

Alls engar breytingar sé heldur að finna í meira en 350 metra fjarlægð frá kvíum.

Aukning aðeins við sjókvíarnar

Einnig er tekið fram að Náttúrustofa Austurlands hafi gert eftirlitsmælingar á næringarefnum í sjó 21. september síðastliðinn, við svipaðar aðstæður í Berufirði og verði í Fáskrúðsfirði.

„Þar kemur fram að á viðmiðunarstöð í um eins kílómetra fjarlægð í straumstefnu er styrkur næringarefna eðlilegur og að aðeins við sjókvíarnar mælist aukning á styrk næringarefna.“

„Að framansögðu er ljóst að ekki er hætta á að sjókvíaeldi í Fáskrúðsfirði hafi neikvæð áhrif á gæði þess sjávar sem Loðnuvinnslan hf. mun nota.“