Morgunblaðið | 8.1.2018 | 13:25 | Uppfært 17:03

„Nýtt Alþingi skítur upp á bak“

Valmundur Valmundsson, formaður Sjómannasambands Íslands. mbl.is/Kristinn Magnússon

„Kannski var þetta óheppilegt orðaval en stundum brestur mann þolinmæðina,“ segir Valmundur Valmundsson, formaður Sjómannasambands Íslands, í samtali við 200 mílur.

„Það er búið að lofa núna í mörg, mörg ár að það verði settur meiri peningur í Gæsluna, til að halda úti öflugri viðbragðssveit, og maður hefur ekki lengur biðlund fyrir því.“

Tilefnið er sú umfjöllun sem birtist í Morgunblaðinu á laugardag, um þau áform Landhelgisgæslunnar að leigja eina af þremur þyrlum sínum til Noregs til að mæta skerðingu á fjárframlögum frá ríkinu.

Birtist í kjölfarið, á laugardagsmorgun, færsla á Facebook-síðu sambandsins þar sem Alþingi voru ekki vandaðar kveðjurnar:

Stærsta öryggisatrði sjómanna

Valmundur viðurkennir að orðavalið kunni að hafa verið óheppilegt, eins og áður sagði.

„En ég held að við sjómenn séum allir sammála um þetta og sjómannafélög hringinn í kringum landið hafa verið dugleg við að álykta um þessi mál,“ segir hann.

„Mönnum finnst bara of langt gengið. Ár eftir ár eftir ár er dregið úr framlögum til Landhelgisgæslunnar. Öflug þyrlusveit er stærsta öryggisatriði okkar sjómanna en við sjáum þjónustuna fara minnkandi með hverju einasta ári, þrátt fyrir loforð manna.“