Morgunblaðið | 10.1.2018 | 14:32 | Uppfært 14:54

Öryggi sjómanna skerðist

Áhöfnin á þyrlu Landhelgisgæslunnar, TF-LÍF, sækir hér veikan sjómann um borð í rússneskan togara, djúpt út af Reykjanesi. Ljósmynd/Landhelgisgæslan

Öryggi sjómanna mun skerðast, gangi eftir sú fyrirætlun stjórnvalda að lækka fjárframlög til Landhelgisgæslunnar. Þetta fullyrðir Landssamband smábátaeigenda, sem lýsir miklum áhyggjum vegna áformanna.

Í tilkynningu frá sambandinu segir að það skori á alþingismenn að tryggja nægt fjármagn til reksturs Landhelgisgæslunnar, þannig að tryggð verði sú þjónusta sem henni sé lögskipað að sinna.

„Þyrluþjónusta er öryggisþáttur sem ávallt verður að vera vel sinnt og ekki má undir neinum kringumstæðum draga úr,“ segir í tilkynningunni.

Gæti leitt af sér björgunarmiðstöð á Íslandi

„Landssamband smábátaeigenda ítrekar fyrri samþykktir sínar á nauðsyn þess að ræða við nágrannaþjóðir okkar um hvort hugsanlegt væri að einhver þeirra eða allar gætu ásamt Íslendingum komið að rekstri þyrlna við Norður-Atlantshaf. Ljóst er að nokkrar þjóðir hefðu þar beina hagsmuni, eins og Færeyingar, Norðmenn, Danir og Grænlendingar.“

Ef af yrði er samstarfið sagt geta jafnvel leitt af sér stofnun sameiginlegrar björgunarmiðstöðvar við Norður-Atlantshaf, með aðsetur hér á landi.

Morgunblaðið greindi á laugardag frá þeim áformum Gæslunnar að leigja mögulega eina þyrlu til útlanda í að minnsta kosti tvo mánuði á þessu ári.