Morgunblaðið | 6.2.2018 | 13:16

Farsælum ferli Sturlaugs lokið

Sturlaugur á siglingu. Skipið var smíðað árið 1981. Ljósmynd/HB Grandi

Ísfisktogarinn Sturlaugur H. Böðvarsson AK kom úr sinni síðustu veiðiferð fyrir HB Granda aðfaranótt þriðjudags í síðustu viku. Var aflinn um 90 tonn af karfa, þorski og ufsa, en með veiðiferðinni lauk farsælum ferli skipsins undir merkjum HB Granda.

Greint er frá þessu á vef útgerðarinnar en áður hefur verið fjallað um nýsmíðina Akurey, sem leysir Sturlaug af hólmi.

Lestu meira

„Höfum tekið stökk inn í nýja öld“

Sturlaugur H. Böðvarsson AK var smíðaður hjá skipasmíðastöð Þorgeirs og Ellerts árið 1981 fyrir Grundfirðinga og hét þá Sigurfari SH. Togarinn, sem er 58,30 metra langur og mælist 431 brúttórúmlest, kostaði á sínum tíma 37,3 milljónir króna að teknu tilliti til fjármagnskostnaðar á smíðatímanum, að því er fram kemur á vef HB Granda.

Hann komst síðar í eigu Haraldar Böðvarssonar hf. og fékk þá Sturlaugsnafnið. Eftir sameiningu Granda og Haraldar Böðvarssonar í HB Granda hefur skipið verið gert út undir merkjum félagsins.

Skipstjóri í síðustu veiðiferð Sturlaugs H. Böðvarssonar fyrir HB Granda var Jón Frímann Eiríksson en hann er sonur Eiríks Jónssonar, sem hefur verið skipstjóri á Sturlaugi frá árinu 2009. Hann er nú tekinn við Akureynni.