Morgunblaðið | 16.3.2018 | 15:13 | Uppfært 22:28

Stuðningsfulltrúinn áfram í gæsluvarðhaldi

Héraðsdómur framlengdi gæsluvarðhald yfir manninum til 13. apríl. mbl.is/Ófeigur

Héraðsdómur Reykjaness úrskurðaði í dag að fyrrverandi starfsmaður Barnaverndar Reykjavíkur skuli sæta áframhaldandi gæsluvarðhaldi á grundvelli almenningshagsmuna.

Maðurinn hefur setið í varðhaldi frá því að hann var handtekinn í janúar og var varðhaldsúrskurðurinn framlengdur um fjórar vikur í dag og gildir nú til 13. apríl.

Í yfirlýsingu frá lögreglu segir að rannsókn málsins hafi miðað vel áfram og að stefnt sé að því að henni ljúki fljótlega.

Í framhaldinu verði málið sent til embætti héraðssaksóknara.

Maðurinn hefur setið í gæsluvarðhaldi síðan 19. janúar, eða í tæpa tvo mánuði. Samtals hafa borist átta kærur á hendur honum fyrir kynferðisbrot gagnvart börnum.