Morgunblaðið | 17.4.2018 | 20:47

„Þetta er galið fyrirkomulag“

Axel segir að víkja þurfi frá ríkjandi fyrirkomulagi. mbl.is/Ófeigur

„Það er bagalegur hringlandaháttur í þessu fyrirkomulagi um ákvörðun fjölda daga,“ segir Axel Helgason, formaður Landssambands smábátaeigenda, spurður um fyrirhugaða reglugerð atvinnuvega- og nýsköpunarráðuneytisins, þar sem leyfi báta til grásleppuveiða verða lengd úr 32 dögum í 44 daga.

Áður hefur vertíðin verið lengd úr 20 dögum í 32 daga.

Frétt af mbl.is

„Bara hroki og yfirgangur“

Lítur til veiðistjórnunar á Grænlandi

„Það hníga öll rök gegn þessu fyrirkomulagi, að veiðarnar séu framlengdar með þetta stuttum fyrirvara og að sjómenn geti þannig ekki skipulagt sig betur, til dæmis hvað varðar mannaráðningar,“ segir Axel í samtali við 200 mílur.

Fulltrúar Landssambands smábátaeigenda funduðu með atvinnuvega- og nýsköpunarráðuneytinu í gær, og segist Axel hafa lagt á það áherslu á fundinum að vikið yrði frá þessu fyrirkomulagi.

„Þetta er galið fyrirkomulag,“ segir hann og vísar meðal annars til þess að í Grænlandi viti menn hversu lengi megi veiða grásleppu í upphafi vertíðar, þar sem miðað sé við veiðireynslu þriggja ára þar á undan. Sú veiðistjórnun hafi fengið eftirsótta vottun MSC - Marine Stewardship Council.

„Það er engin ástæða til að skoða ekki hvort við getum tekið upp sama fyrirkomulag.“

Grásleppa skorin á Húsavík. Mynd úr safni. mbl.is/Hafþór

Reikna ráðgjöf út frá þúsund grásleppum

Þá bendir hann á að skoða þurfi þá aðferðafræði Hafrannsóknastofnunar, að nota þá grásleppu sem veiðist í vorrallinu sem grundvöll veiðiráðgjafar. Grásleppa sé uppsjávarfiskur og í rallinu sé togað á 600 stöðvum í landhelginni, sem í ár hafi skilaði tæplega 1.000 grásleppum.

Til að setja þá tölu í samhengi megi geta þess að þessar þúsund grásleppur séu um það bil þrjú tonn. Út frá þeim sé svo reiknuð ráðgjöf upp á tæp 5.500 tonn.