Morgunblaðið | 31.5.2018 | 17:53 | Uppfært 29.6.2018 14:41

Ræddu fundarstjórn í 5 klukkustundir

Þorsteinn Sæmundsson, sakaði Kristján Þór Júlíusson um að fá þingmenn til þess að vinna skítverk fyrir sig. mbl.is/Kristinn Magnússon

Þorsteinn Sæmundsson, þingmaður Miðflokksins, sagði ráðherra vera „að fá þingmenn til þess að vinna skítverk fyrir sig.“ Þetta kom fram í umræðum á Alþingi í dag um að veita afbrigði frá hefðbundinni dagskrá til þess að taka til umfjöllunar tillögu atvinnuveganefndar um veiðigjöld. Þorsteinn vildi meina að ráðherra hefði sjálfur átt að leggja fram frumvarp um veiðigjöld.

Miklar deilur hafa verið á þingi um hvort taka eigi umrædda tillögu á dagskrá þar sem talið er að til standi að lækka veiðigjöld. Einnig var deilt um að lengja þingfund vegna málsins.

Frétt af mbl.is

Engin veiðigjöld ef ekkert er gert

Minnihlutinn ræddi um dagskrá þingsins og lengingu þingfundar í tæpa 5 klukkutíma, en enginn þingmaður meirihlutans tók til máls. Í atkvæðagreiðslu var þingfundur lengdur og voru 29 atkvæði greidd með lengingu en 25 gegn.

Í umræðum um atkvæðagreiðslu um að taka málið á dagskrá kom í ljós að mikill hiti var í þingmönnum vegna málsins. Sakaði meðal annars Logi Einarsson, formaður og þingmaður Samfylkingarinnar, meirihlutann um óeðlileg vinnubrögð.

Þá sagði hann að augljóst væri að sjávarútvegsráðherra, Kristján Þór Júlíusson, hafi ekki þorað að leggja fram frumvarp um málið og þess í stað látið það verk í hlut þingmanna meirihlutans. „Þorirðu ekki,“ kallaði Logi einnig úr þingsal.

Meirihluti þingmanna samþykkti að taka málið á dagskrá. Til þess að taka tillöguna til umfjöllunar í dag hefði þurft aukinn meirihluta, slíkur meirihluti fékkst ekki og verður málið því ekki tekið fyrir fyrr en í næstu viku.