Morgunblaðið | 9.7.2018 | 14:36 | Uppfært 10.7.2018 6:54

Kaupa íslenskan búnað í fjögur ný skip

Teikning af skipi Skinneyjar-Þinganess.

Útgerðirnar Skinney-Þinganes og Gjögur hafa gert saming við íslenska fyrirtækið Micro um smíði á vinnslubúnaði í nýja togara hjá félögunum tveimur. Hvor útgerð um sig fær afhent tvö sams konar skip og er því alls um að ræða fjögur skip.

Skipin, sem búnaðurinn fer í, eru smíðuð hjá skipasmíðastöðinni VARD í Noregi og eru væntanleg til landsins á seinni hluta ársins 2019.

Að því er fram kemur í tilkynningu mun Micro annast hönnun, smíði og uppsetningu á vél- og hugbúnaðarbúnaðarhluta verkefnisins, en hugbúnaðurinn er unninn í samstarfi við Völku. Uppsetning mun eiga sér stað við komu skipanna til hafnar á Íslandi.

Teikning af skipi Gjögurs.

Lögð áhersla á öfluga kælingu

Búnaðurinn sem um ræðir nær til allrar vinnslu um borð í skipunum, eða frá því fiskurinn kemur lifandi um borð og þar til hann er kominn í kör niður í lest. Öll hönnun og smíði búnaðarins er unnin í nánu samstarfi við útgerðirnar þar sem horft er til þess að saman fari góð meðferð afla, framúskarandi nýting hráefnis og besta mögulega vinnuaðstaða háseta. Mikil áhersla er lögð á rétta blæðingu afla og öfluga kælingu, en það eykur gæði og verðmæti aflans.

„Það er afskaplega ánægjulegt að þessi öflugu útgerðarfélög velji að kaupa búnað af innlendum framleiðendum og styðja þannig við íslenskt hugvit,“ er haft eftir Gunnari Óla Sölvasyni, framkvæmdastjóra Micro.

„Uppbygging tækniþekkingar og framfara í sjávarútvegi er samstarfsverkefni sem snertir okkur öll beint og óbeint, þar sem hún stuðlar að aukinni vermætasköpun og virðisaukningu innanlands, skapar störf og eykur útflutningsverðmæti þeirrar sameiginlegu auðlindar sem fiskurinn okkar er.“