Morgunblaðið | 18.9.2018 | 19:15 | Uppfært 20:22

Vænta góðs samstarfs eftir kaupin

Jón Eðvald Friðriksson, framkvæmdastjóri FISK Seafood. mbl.is/Hafþór Hreiðarsson

Jón Eðvald Friðriksson, framkvæmdastjóri FISK-Seafood ehf., segir fyrirtækið sjá mikil tækifæri í rekstri Vinnslustöðvarinnar. 200 mílur greindu fyrr í dag frá kaupum FISK á öllum hlut Brims hf. í útgerðinni, fyrir 9,4 milljarða króna.

Frétt af mbl.is

Kaupa hlut Brims fyrir 9,4 milljarða

„Það hefur verið mikil umræða um að Brim hygðist selja þennan eignarhlut, og í framhaldinu fórum við í viðræður um þessi kaup,“ segir Jón Eðvald í samtali við 200 mílur.

Tekur hann fram að hjá FISK hafi menn væntingar um gott og farsælt samstarf við aðra eigendur og stjórnendur Vinnslustöðvarinnar.

Ýmsir möguleikar á samvinnu

Spurður um þau tækifæri sem FISK sjái í Vinnslustöðinni segir Jón að horft sé á uppsjávargeirann.

„FISK hefur lengi haft áhuga á að tengjast með eignarlegum hætti fyrirtæki sem er í veiðum og vinnslu á uppsjávarfiski,“ segir hann.

„Við náum því með þessum kaupum, en ekki síður finnst okkur þetta spennandi fyrirtæki til að eiga í, og við teljum að til staðar séu ýmsir möguleikar á samvinnu þessara tveggja sjávarútvegsfyrirtækja.“