Morgunblaðið | 19.9.2018 | 13:09 | Uppfært 15:53

Bendir á tengsl Fréttablaðsins og VSV

Guðmundur segist hafa fengið upplýsingar frá SE í júlí um að kaupin væru til athugunar. mbl.is/Kristinn Magnússon

Stjórnarformaður Fréttablaðsins er einnig lögmaður meirihlutaeigenda Vinnslustöðvarinnar í Vestmannaeyjum hf. og sömuleiðis varaformaður stjórnar fyrirtækisins. Þetta segir Guðmundur Kristjánsson, forstjóri HB Granda og eigandi Brims.

Í tilkynningu frá Guðmundi, sem send er út í tilefni fréttar Fréttablaðsins um athugun Samkeppniseftirlitsins á kaupum Brims hf. á hlutabréfum í HB Granda hf., segir hann að eftirlitið hafi haft kaupin í athugun og hafi sent félögunum erindi þess efnis í júlí.

Frétt af mbl.is

Grunaður um alvarlegt brot á samkeppnislögum

„Þar kemur fram að Samkeppniseftirlitið skoðar fjögur atriði. Í fyrsta lagi hvort tilkynningarskyldur samruni hafi átt sér stað þegar Brim hf. eignaðist þann 4. maí 34% hlut í HB Granda. Það er enn í skoðun,“ segir í tilkynningu Guðmundar.

„Í öðru lagi hvort það standist 10. gr. samkeppnislaga að aðaleigandi Brims hf. sé forstjóri HB Granda. Það er enn í skoðun.

Í þriðja lagi hvort stjórnarseta aðaleiganda Brims hf. í stjórn Vinnslustöðvarinnar brjóti gegn 10. gr. samkeppnislaga. Það er rangt að Guðmundur Kristjánsson hafi í vor verið í stjórn Vinnslustöðvarinnar og þarfnast því ekki frekari skoðunar.“

Bent er á að í fjórða lagi sé athugað hvort tilkynningaskyldur samruni hafi átt sér stað þegar Brim hf. keypti allt hlutafé í Ögurvík árið 2016.

„Samskipti áttu sér stað við Samkeppniseftirlitið á þeim tíma og var það sameiginleg niðurstaða þá að þessi viðskipti væru ekki tilkynningarskyld og er það atriði ekki lengur til skoðunar. Mál þetta var til umfjöllunar í fjölmiðlum í byrjun júlí á þessu ári og þá sagði Guðmundur í viðtali við Morgunblaðið að eðlilegt væri að eftirlitsstofnanir væru að fylgjast með viðskiptalífinu og er hann enn þeirrar skoðunar,“ segir í tilkynningunni.

Að lokum segir að vegna umræddrar forsíðufréttar Fréttablaðsins megi geta þess, að stjórnarformaður Fréttablaðsins sé einnig lögmaður meirihlutaeigenda Vinnslustöðvarinnar í Vestmannaeyjum hf. og varaformaður stjórnar fyrirtækisins, en maðurinn sem um ræðir er Einar Þór Sverrisson.