Morgunblaðið | 8.10.2018 | 14:53 | Uppfært 9.10.2018 4:42

Sætta sig ekki við „slík hryðjuverk“

Fiskeldi á Vestfjörðum er að verða burðarás atvinnulífs í fjórðungnum, að því er segir í yfirlýsingunni. mbl.is/Helgi Bjarnason

„Vanhugsaðar stjórnvaldsaðgerðir með afturköllun starfs- og rekstrarleyfa fiskeldisfyrirtækja hafa valdið ótta, óöryggi og reiði íbúa á Vestfjörðum.“ Þetta kemur fram í yfirlýsingu frá stjórn Verkalýðsfélags Vestfirðinga, en hún segist fordæma aðgerðirnar og að hún muni „ekki sætta sig við slík hryðjuverk“.

Kallar stjórnin eftir samfélagsábyrgð þeirra sem standa að slíkum ákvörðunum, að því er segir í yfirlýsingunni. Fiskeldi á Vestfjörðum sé að verða burðarás atvinnulífs í fjórðungnum og atburðarásin, ef ekkert verði að gert, muni hafa afdrifaríkar afleiðingar fyrir Vestfirði og samfélagið þar til frambúðar.

Líklegt að starfsmönnum verði sagt upp

„Að svipta fyrirtækin starfs- og rekstrarleyfi setur störf um 300 einstaklinga í bráða hættu með tilheyrandi skaða fyrir byggð á Vestfjörðum. Ef umrædd rekstrar- og starfsleyfi eru ekki fyrir hendi er rekstargrundvöllur fyrirtækjanna brostinn og líklegt að öllum starfsmönnum verði sagt upp,“ segir í yfirlýsingunni.

„Það er áfall fyrir íbúa og atvinnulíf á Vestfjörðum að úrskurðarnefnd umhverfis- og auðlindamála hafi hafnað beiðni fiskeldisfyrirtækja á sunnanverðum Vestfjörðum um frestun réttaráhrifa og fellt úr gildi starfs- og rekstrarleyfi fyrirtækja sem eru lífæðar atvinnu á sunnanverðum Vestfjörðum.

Stjórn Verkalýðsfélags Vestfirðinga krefst þess að Alþingi og ríkisstjórn grípi inn í og tryggi að illa ígrundaðar stjónvaldsaðgerðir kippi ekki stoðunum undan rekstri fiskeldisfyrirtækja á Vestfjörðum.“