Morgunblaðið | 26.10.2018 | 13:49

„Í raun er allt undir“

Smábátar í Hólmavíkurhöfn. Fyrirtækin tvö eru burðarásar í atvinnulífinu á Hólmavík. mbl.is/Golli

„Í raun er allt undir og brotthvarf annars mundi hafa gríðarleg áhrif á hitt og þá um leið á allt samfélagið hér á Hólmavík,“ segir Viktoría Rán Ólafsdóttir, stjórnarformaður rækjuvinnslunnar Hólmadrangs og kaupfélagsstjóri Kaupfélags Steingrímsfjarðar á Hólmavík, í samtali við Morgunblaðið í dag.

Þriggja vikna greiðslustöðvun Hólmadrangs rennur út um mánaðamótin. Viktoría Rán segir að sótt verði um framlengingu á greiðslustöðvuninni til þriggja mánaða. Á þeim tíma verði unnið áfram að því að endurreisa fyrirtækið, meðal annars með endurskipulagningu og sölu eigna.

Kaupfélag Steingrímsfjarðar á 50% í Hólmadrangi og FISK Seafood hinn helminginn. Nú starfa um 20 manns hjá Hólmadrangi og heldur fleiri hjá Kaupfélaginu. Þessi tvö fyrirtæki eru burðarásar í atvinnulífinu á Hólmavík og segir Viktoría að hagsmunir fyrirtækjanna séu samtvinnaðir og þau séu rekin sem samstæða.

Erfiðleikar tengdir Brexit

Erfiðleika í rekstri fyrirtækisins rekur Viktoría til ákvörðunar Breta 2016 að ganga úr Evrópusambandinu, en stærsti markaður fyrirtækisins sé Bretland. Eftir Brexit hafi gengi pundsins fallið og afurðasala frosið. Engin hreyfing hafi verið á rækjubirgðum Hólmadrangs og tilraun til að koma hreyfingu á söluna hafi leitt til óhagstæðra samninga og um tíma hafi verið selt undir kostnaðarverði.

Ítarlegar er fjallað um málið á síðu 16 í Morgunblaðinu í dag.