Krefjast jafnræðis í veiðigjöldum

Sé það vilji stjórnvalda að leggja á veiðigjöld, þá hlýtur það að vera skýlaus krafa að jafnræði sé í slíkri skattlagningu og að ein grein sjávarútvegs verði ekki tekin út sérstaklega og lögð á hana aukin gjöld umfram aðrar. Þetta segir í umsögn bæjarráðs Fjarðabyggðar sem send hefur verið Alþingi vegna frumvarps sjávarútvegs- og landbúnaðarráðherra til breytinga á lögum um veiðigjöld. 

Í bókun bæjarráðs, sem samþykkt var á fundi ráðsins á mánudag, segir að ráðið mótmæli harðlega boðaðri aukagjaldtöku, í formi 10% hækkunar á heildartekjum útgerðar, sem lögð verði á uppsjávarstofna umfram aðrar tegundir sjávarfangs.

Máttarstólpar í sveitarfélaginu

„Með því að hækka heildartekjur um 10% getur reiknistofn veiðigjalds hækkað allt að 50% til 60% sem þýðir í raun að skattstofn er í raun milli 46% til 66% á uppsjávartegundir en ekki 33% eins og boðað er á aðrar fisktegundir,“ segir í bókun ráðsins, sem varð svo að umsögn til Alþingis.

Tekið er fram að í sveitarfélaginu starfi þrjú stór og öflug sjávarútvegsfyrirtæki sem hafi fjárfest mikið í uppbyggingu og skipakosti í tengslum við veiðar á uppsjávarafurðum.

„Þessi fyrirtæki eru máttarstólpar í Fjarðabyggð hvað varðar atvinnu, tekjur og samfélagslega uppbyggingu og leggja mikið til íslensk samfélags í formi skatta og verðmætasköpunar til útflutnings. Sé það vilji stjómvalda að leggja á veiðigjöld þá hlýtur það að vera skýlaus krafa að jafnræði sé í slíkri skattlagningu og ein grein sjávarútvegs ekki tekin út sérstaklega og lagt á hana aukin gjöld umfram aðrar, að ógleymdu þeirri miklu óvissu sem nú ríkir varðandi stöðu loðnu- og makrílstofnsins. Slíkt mun verða til þess að fjárfestingar og frekari uppbygging í uppsjávariðnaði mun dragast saman.“

Sveitarfélög fái hlutdeild í veiðigjöldum

Bæjarráðið bendir einnig á fyrri bókanir sínar um veiðigjöld, „og þá eðlilegu kröfu að veiðigjöld séu sanngjöm og í takt við afkomu sjávarútvegsins hverju sinni“.

„Einnig ítrekar bæjarráð þá afstöðu sína að viðkomandi sjávarútvegssveitarfélög fái hlutdeild í veiðigjöldum í ljósi þeirra fjárfestinga sem viðkomandi sveitarfélög hafa lagt út í og hvaðan þessi útflutningsverðmæti koma.“