Morgunblaðið | 15.11.2018 | 17:52 | Uppfært 16.11.2018 8:51

Stefna Heiðveigar þingfest á morgun

Stefna Heiðveigar Maríu Einarsdóttur gegn Sjómannafélagi Íslands verður þingfest fyrir félagsdómi á morgun. mbl.is/Eggert

Stefna Heiðveigar Maríu Einarsdóttur gegn Sjómannafélagi Íslands verður þingfest fyrir félagsdómi á morgun. Þetta staðfestir Kolbrún Garðarsdóttir, lögmaður Heiðveigar, í samtali við mbl.is. „Það er búið að birta stefnuna og þetta verður þingfest í félagsdómi á morgun,“ segir Kolbrún. Stundin greindi fyrst frá.

Stefnan byggir á því að stjórnin hafi brotið gegn 2. grein laga um stéttarfélög og vinnudeilur sem kveður á um að stéttarfélög skuli vera opin öllum í hlutaðeigandi starfsgrein á félagssvæðinu.

„Við erum að fara fram á að það verði viðurkennt að félagið hafi brotið ákvæði laga um stéttarfélög og vinnudeilur með því annars vegar að reka hana úr félaginu og hins vegar með því að breyta kjörgenginu,“ segir Kolbrún.

Frétt af mbl.is

Heiðveig undirbýr mál sitt

Einnig er farið er fram á miskabætur, sem og að Sjómannafélaginu verði gert að greiða sekt sem verði látin renna í ríkissjóð.

Farið er fram á flýtimeðferð fyrir dóminum, auk þess sem Kolbrún ætlar að fara fram á að kosningu til stjórnar verði frestað, sem og því að framboðslistar verði lagðir fram á meðan málið er fyrir dómi. „Mér finnst eðlilegt að það verði gert,“ segir hún, en framboðsfrestur rennur út á hádegi á mánudag og kosningar eiga að hefjast 24. þessa mánaðar.