Morgunblaðið | 22.11.2018 | 14:50

„Ófyrirsjáanlegur farsi“

Heiðveig María segir tilgang dómsmálsins vera að skera úr um lögmæti brottrekstrarins úr félaginu. mbl.is/Eggert

„Við fordæmum þessar aðgerðir,“ segir Heiðveig María Einarsdóttir, sem bauð sig fram til formennsku í Sjómannafélagi Íslands, við mbl.is um ákvörðun kjörstjórnar félagsins að hafna mótframboði hennar, B-lista. Þá kallar hún atburðarásina sem fór af stað eftir að hún tilkynnti framboð sitt „ófyrirsjáanlegan farsa“.

Taldi kjörstjórn B-lista ekki lögmætan þar sem framboðið bauð lista til stjórnar og varastjórnar, en ekki matsveinadeildar eða trúnaðarráðs, fyrir utan að Heiðveig María var ekki skráður félagi í félaginu. Henni hafði verið vísað úr félaginu af trúnaðarráði.

Frétt af mbl.is

Framboði Heiðveigar Maríu hafnað

Brottrekstur Heiðveigar Maríu úr Sjómannafélag Íslands bíður þess að verða tekinn fyrir hjá félagsdómi og upplýsir hún að aðalmeðferð fari fram 14. desember.

Hún segir tilgang dómsmálsins vera að skera úr um lögmæti brottrekstrarins úr félaginu sem og reglu um að þurfa að hafa greitt í félagið síðastliðin þrjú ár til þess að vera kjörgengur.

„Miðað við viðbrögð forsvarsmanna félagsins undanfarið býst ég ekki við miklu frá þeim, en þeir verða að una þeim dómi að brottrekstur minn hafi verið ólögmætur,“ svarar Heiðveig María spurð um afleiðingar þess að félagsdómur myndi dæma í henni hag.

„Það er ný stjórn, hún er sjálfkjörin, þeir tóku ákvörðun um það. Við getum ekkert hnekkt því, það eru engin úrræði til þess að neinu leyti þar sem Sjómannafélag Ísland er ekki aðili að heildarsamtökum,“ segir hún.

Heiðveig María ítrekar von um að forsvarsmenn félagsins uni niðurstöðu félagsdóms, verði hún henni í hag.