Morgunblaðið | 11.12.2018 | 5:30

Umræðu lokið um veiðigjaldafrumvarp ríkisstjórnarinnar

Frumvarpið snýst um að breyta álagningu veiðigjalda. mbl.is/Eggert Jóhannesson

Þriðju umræðu um frumvarp ríkisstjórnarinnar um veiðigjöld lauk á Alþingi í gærkvöldi en atkvæðagreiðslu var frestað.

Frumvarpið snýst um að breyta álagningu veiðigjalda. Aðallega að færa álagninguna nær í tíma, þannig að þau endurspegli betur afkomu útgerðarinnar. Álagningin verður byggð á ársgömlum gögnum í stað um tveggja ára eins og nú. Meðal annarra breytinga er að veiðigjaldsnefnd er lögð niður og úrvinnsla gagna og álagning færð til ríkisskattstjóra.

Meirihluti atvinnuveganefndar lagði til að frumvarpið yrði samþykkt óbreytt eins og það var afgreitt eftir aðra umræðu. Nefndarmenn fjögurra flokka stjórnarandstöðu lögðust gegn frumvarpinu og vildu að núverandi lög yrðu framlengd um eitt ár.