Morgunblaðið | 11.12.2018 | 15:13 | Uppfært 12.12.2018 6:54

Veiðigjaldafrumvarpið samþykkt

Frá þingfundi á Alþingi. mbl.is/Eggert

Frumvarp Kristjáns Þórs Júlíussonar, sjávarútvegs- og landbúnaðarráðherra, til nýrra laga um veiðigjöld hefur verið samþykkt á Alþingi með 32 atkvæðum. Sextán þingmenn greiddu atkvæði gegn frumvarpinu og tíu sátu hjá.

Þriðju umræðu um frumvarpið lauk á Alþingi í gærkvöldi en atkvæðagreiðslu var þá frestað.

Með frumvarpinu breytist álagning veiðigjalda og hún færð nær í tíma, til að veiðigjöldin geti betur endurspeglað afkomu útgerðarinnar. Álagningin verður byggð á ársgömlum gögnum í stað um tveggja ára eins og nú. Þá verður veiðigjaldsnefnd lögð niður og úrvinnsla gagna og álagning færð til ríkisskattstjóra, samkvæmt frumvarpinu.

Meirihluti atvinnuveganefndar lagði til að frumvarpið yrði samþykkt óbreytt eins og það var afgreitt eftir aðra umræðu. Nefndarmenn fjögurra flokka stjórnarandstöðu lögðust gegn frumvarpinu og vildu að núverandi lög yrðu framlengd um eitt ár.