Morgunblaðið | 18.12.2018 | 12:31 | Uppfært 12:51

Greinargerð um Samherja frestast fram á næsta ár

Seðlabankinn hefur óskað eftir að fá frekari frest til að skila Samherjaskýrslunni. mbl.is/Ófeigur Lýðsson

Greinargerð Seðlabankans um mál Samherja verður ekki skilað fyrr en á næsta ári, en upphaflega átti að skila henni 7. desember. Fram kemur á vefsíðu Seðlabankans að bankaráð bankans hafi falið Gylfa Magnússyni, formanni bankaráðsins, að rita forsætisráðherra og greina henni frá því að frekari frest þurfi til að svara erindinu.

Kemur fram að vonir standa til þess að hægt verði að ganga frá svarinu í upphafi nýs árs.

Forsætisráðherra óskaði eftir greinargerðinni 12. nóvember og átti hún að ná til mála Samherja frá þeim tíma sem rannsókn hófst á meintum brotum á reglum um gjaldeyrismál.